السر الأول ..

... {الْحَمْدُ للّهِ رَبِّ الْعَالَمِينَ } الفاتحة (2) ...

 

الحمد لله .. على افتتاح المدونة .. والحمد لله .. إنه في زائر كريم يقرأ سطوري .. ^_^ ..  والحمد لله على كل شيء لأني لو جلست من هنا إلى ما أموت ما راح أقدر أحصي نعم الله علي ..

وأنا متأكدة أنكم تحسوا بنفس الشي .. لا تقولوا لي إنكم ما حاولتوا في يوم تتأملوا نعم الله عليكم ؟! ..

أنا عن نفسي تأملت .. ولقيت إني ما أقدر أعدها .. نفس الشي معاكم ؟؟

طيب خلينا نقول إنك مريض وفقير وجاهل ودايماً حظك تعبان ..

أول نعمة هنا عندك .. (( إنك حي )) ...

بما أنك حي .. تقدر تعبد الله وتاخد حسنات أكثر عشان تدخل الجنة بإذن الله ..

بما أنك حي .. عندك فرصة تتوب .. غيرك مات على المعصية .. صح ولا لا ؟

بما أنك حي .. تقدر تقول يارب .. وتدعي الله وتتحقق أمنياتك بإذن الله ..

الحياة نعمة .. الحمد لله ...

ثاني نعمة عندك .. (( أنت مسلم )) ..

الإسلام نعمة كبيييييرة ... كفاية إنك تعرف مين خلقك .. غيرك مو عارف .. كفاية إنك تسجد له .. غيرك يسجد لغيره ..

كفاية إنك وحدته ... غيرك يعبد عدد الله أعلم بيه من الآلهة ..

الإسلام نعمة .. الحمد لله ...

ثالث نعمة عندك .. (( إنك قلت الحمد لله )) ..

ايوه .. هادي نعمة ... ونعمة كبيرة ! .. غيرك ما يقول الحمد لله .. ربنا كريم .. يعطيك بغير حساب .. تشكر .. يعطيك زيادة + أجر خاص على الحمد .. تخيلوا !!

الحمد نعمة ... الحمد لله ..

الأسرة , الأمن , الشبع , الارتواء , الصحة , السمع , البصر , الفهم , الحركة ,التوحيد , .. ترى والله ما تنعد ..

طيب نقول في وحده كيووت وأموورة كدا حبتك مره وأهدتلك هدية مررره حلوة .. نخليها طقم ذهب عيار 18  *_* ..
ايش ممكن تكون ردة فعلك إذا قبلتي الهدية ؟؟ أكيد ما راح تنسيلها هي طووول عمرك وراح تحبيها و تشكريها وتشيليها فوق راسك على مدى العمر صح ؟ أكيد .. طيب مابالك باللي أهدى هادي النعم كلها لنا .. اللي وحده فيهم بس والله مايجي قدامها طقم الذهب شي ! ..
هل حمدناه حمد يكفي .. هل شكرناه شكر يكفي .. لا والله .. طيب هل استعملنا هداياه هادي في الشي اللي يرضيه ؟؟!

في نعمتين من نوع جديد .. ما أقدر أوصفه ... أقولها لكم .. الأولى .. لما تكون في بيتك أو غرفتك لوحدك .. أو تكون مع أصحاب السوء ><" ... لما يجي الشيطان ويقولك " سوي كذا .. ما حد شايفك أو شايفكم " .. يعني معصية .. تسويها ...

لما ما أحد يجي يدخل عليك .. لما ما أحد كشفك أو فضحك ... (( نعمة الستر )) .. الله يسترك وانت بتعصيه ! ..

ليه ؟ .. إن الله غني عن العالمين ... بس هادي رحمة الله .. الله رحيم كريم .. ما يبغاك تنفضح .. يبغاك تتوب وماضيك مستور ..

لأن رحمة الله أوسع من كل شيء ..

ثاني وحده نعمة (( الحلم .. حلم الله وصبره)) .. الله حلييييم صبووور ... ترى الله يقدر علينا و ياكثر ذنوبنا ..

لكن الله سبحانه وتعالى بيعطينا فرصة عشان نتوب .. يصبر علينا .. من رحمته ...

نعم .. الحمد لله ..

اللي أبغى أقوله .. إنه الحمد كلمات نفرح احنا بها .. لأنها هي بحد ذاتها نعمة .. دايماً خلوها على لساننا .. الحمد لله .. الحمد لله ..

اللهم لك الحمد كما ينبغي لجلال وجهك وعظيم سلطانك ... الحمد لله ..